Media shtetërore iraniane kanë konfirmuar zyrtarisht vdekjen e Udhëheqësit Suprem të Iranit, Ajatollah Ali Khamenei.
Transmetuesi publik IRIB raportoi në orët e para të mëngjesit të së dielës se “Udhëheqësi Suprem ka arritur martirizimin”, duke e cilësuar ndarjen e tij nga jeta si një sakrificë në shërbim të vendit.
Edhe agjencia e lajmeve Mehr, e afërt me shtetin iranian, deklaroi se Khamenei “sakrifikoi jetën për ngritjen e Iranit” dhe se tashmë “është bashkuar me martirët”.
Pas njoftimit, autoritetet iraniane shpallën 40 ditë zie kombëtare në nder të liderit shpirtëror dhe politik të Republikës Islamike.
Lajmi vjen në një moment tensionesh të larta, pasi Shtetet e Bashkuara të Amerikës dhe Izraeli kishin deklaruar më herët se Khamenei ishte vrarë si pasojë e një vale sulmesh të koordinuara amerikano-izraelite ndaj Iranit.
