Britney Spears po përballet me një çështje ligjore në Kaliforni, pasi më 30 prill u ngritën akuza ndaj saj për drejtim mjeti nën ndikimin e substancave. Sipas autoriteteve, këngëtarja akuzohet për një kundërvajtje të vetme që lidhet me përdorimin e kombinuar të alkoolit dhe të paktën një droge, megjithëse në dokumentet zyrtare nuk jepen detaje për llojin apo sasinë e substancave të dyshuara.
Ngjarja daton më 4 mars, kur Spears u ndalua nga policia për drejtim të shpejtë dhe të parregullt të automjetit të saj, një BMW e zezë, pranë banesës së saj. Ajo u arrestua në vendngjarje, por u lirua një ditë më vonë, ndërsa hetimi u përmbyll dhe iu dorëzua prokurorisë më 23 mars.
Seanca gjyqësore është caktuar për të hënën, më 4 maj. Duke qenë se bëhet fjalë për një kundërvajtje, Spears nuk është e detyruar të jetë fizikisht e pranishme në sallën e gjyqit.
Prokurorët pritet t’i propozojnë asaj një marrëveshje të njohur si “wet reckless”. Nëse e pranon, këngëtarja do të shpallet fajtore për një akuzë më të lehtë dhe mund të përfitojë një dënim më të zbutur, që përfshin 12 muaj provë, njohjen e kohës së kaluar në paraburgim, ndjekjen e një programi të detyrueshëm për drejtimin nën ndikim dhe pagesën e gjobave përkatëse.
Një ofertë e tillë zakonisht u bëhet personave që tregojnë gatishmëri për të përmirësuar sjelljen dhe për të kërkuar ndihmë.
Britney Spears ka qenë shpesh në qendër të vëmendjes mediatike që nga fillimi i viteve 2000, jo vetëm për suksesin e saj muzikor, por edhe për sfidat personale që ka kaluar. Në vitin 2008 ajo u vendos nën kujdestari ligjore, e cila zgjati më shumë se një dekadë, deri në përfundimin e saj në vitin 2021.
E njohur për hite të shumta si “Toxic”, “Gimme More” dhe “I’m a Slave 4 U”, Spears mbetet një nga figurat më të rëndësishme të muzikës pop ndërkombëtare.
