Emily Blunt është vënë në qendër të diskutimeve online pas një deklarate të bërë gjatë promovimit të filmit “The Devil Wears Prada 2”. Aktorja ndau një mendim për zgjedhjet në karrierë që u prit me reagime të përziera, sidomos në klimën aktuale ekonomike.
E pyetur se çfarë do t’u sugjeronte grave që nuk ndihen mirë në vendin e punës, Blunt fillimisht u përgjigj me humor: “Largohuni nga puna… jo”. Më pas ajo e sqaroi më seriozisht qëndrimin e saj.
“Sinqerisht, kërkoni diçka që e doni vërtet. Edhe nëse nuk ju sjell të ardhura, nëse ju bën të lumtura, ka vlerë”, u shpreh ajo.
Kjo ide nuk u prit njësoj nga të gjithë. Shumë njerëz e konsideruan të shkëputur nga realiteti, duke theksuar se në kushtet e rritjes së çmimeve dhe pasigurive financiare, heqja dorë nga një punë pa një alternativë konkrete është e rrezikshme.
Në “Reddit”, përdorues të shumtë reaguan kritikisht: disa theksuan se pasioni nuk mjafton për të mbuluar shpenzimet, ndërsa të tjerë sugjeruan një qasje më pragmatike – gjetjen e një pune tjetër përpara se të merret vendimi për largim.
Nga ana tjetër, kishte edhe zëra që e mbështetën aktoren, duke argumentuar se deklarata e saj mund të jetë keqinterpretuar dhe se ajo thjesht po inkurajonte njerëzit të mos heqin dorë nga ajo që duan.
Disa komentues vunë në dukje se figura publike shpesh përballen me kritika të ngjashme, pavarësisht mënyrës se si shprehen, duke e lidhur reagimin edhe me perceptimin e privilegjit në industrinë e argëtimit.
