Një robot humanoid ishte surpriza kryesore e ditës së dytë të konferencës ndërkombëtare mbi inteligjencën artificiale në arsim, të organizuar nga Melania Trump në Uashington D.C. Roboti shoqëroi zonjën e parë të Shteteve të Bashkuara përgjatë një korridori të Shtëpisë së Bardhë dhe më pas iu drejtua të ftuarve duke u uruar mirëseardhjen në disa gjuhë.
Kjo javë shënon takimin e bashkëshorteve të liderëve botërorë si pjesë e nismës së saj “Nxitja e së Ardhmes”, që synon të përmirësojë jetën e fëmijëve përmes arsimit dhe përdorimit të teknologjisë. Melania theksoi rëndësinë e shfrytëzimit të inteligjencës artificiale, duke adresuar edhe rreziqet e mundshme që lidhen me zhvillimin e shpejtë të saj.
“Bota jonë po ndryshon shpejt, dhe inteligjenca artificiale na mundëson të qasemi në njohuritë e grumbulluara gjatë shekujve,” tha zonja e parë. Ajo shtoi se është përgjegjësi e shtetit që brezi i ardhshëm të ketë akses në një arsim të avancuar teknologjik, pasi investimi në aftësitë dixhitale dhe trajnimin e fëmijëve është vendimtar për forcën ekonomike të Shteteve të Bashkuara në të ardhmen.
Nisma e Melania Trump u prezantua për herë të parë në Asamblenë e Përgjithshme të OKB-së në shtator, ku morën pjesë përfaqësues nga 45 vende. Gjatë ditës së parë të konferencës, diskutimi u përqendrua te përdorimi i AI-së në arsim, aftësitë dixhitale, siguria online dhe mjetet e teknologjisë arsimore (EdTech), përfshirë softuerë dhe aplikacione të dedikuara për përdorim në klasë.
