Djemtë e Britney Spears, Sean Preston Federline dhe Jaden James Federline, thuhet se kanë nisur të përdorin mbiemrin “Spears”, duke lënë mënjanë atë të babait të tyre, Kevin Federline. Megjithatë, sipas raportimeve, ky ndryshim mbetet ende jozyrtar dhe nuk është reflektuar në dokumente ligjore.
Ky zhvillim vjen në një moment të rëndësishëm për familjen, vetëm pak ditë pasi këngëtarja ndau në rrjetet sociale foto të rralla me djemtë, duke shënuar një ribashkim të shumëpritur pas një periudhe të gjatë distance. Në imazhet e publikuara, ata shfaqen të qeshur dhe të relaksuar gjatë një shëtitjeje me varkë, me Britney në qendër të vëmendjes.
Britney Spears u bë nënë në vitet 2005 dhe 2006 gjatë martesës me Kevin Federline, nga i cili u nda në vitin 2007. Për vite me radhë, marrëdhënia me djemtë ishte e tensionuar, sidomos pasi ata u zhvendosën në Hawaii në vitin 2023 së bashku me të atin.
Së fundmi, ata janë rikthyer në California dhe raportet familjare duket se janë përmirësuar ndjeshëm. Burime pranë familjes bëjnë me dije se djemtë po qëndrojnë më afër nënës dhe po e mbështesin në këtë periudhë.
Sipas të njëjtave burime, afrimi me fëmijët ka ndikuar pozitivisht edhe në gjendjen emocionale të këngëtares, e cila tashmë duket më e lumtur dhe mirënjohëse që i ka sërish pranë në jetën e saj.
