Zhani Ziçishti, aktori i njohur i skenës teatrale dhe kinematografisë shqiptare, u nda nga jeta në moshën 85-vjeçare, duke lënë pas një trashëgimi të pasur artistike që do të mbahet gjatë në kujtesën e publikut. Miqtë, kolegët dhe dashamirësit e tij e kujtojnë si një figurë të veçantë të artit, përkushtimin dhe talentin e jashtëzakonshëm në çdo rol që interpretoi.
“Ai kishte një botë shpirtërore të pasur dhe një talent unik,” thotë një bashkëpunëtor. “Qoftë në rolet protagoniste, qoftë në ato dytësore, Zhani krijonte personazhe që mbeten të paharrueshme. Interpretimi i tij ishte gjithmonë natyral dhe i thjeshtë, dhe çdo skenë me të shndërrohej në një eksperiencë të veçantë. Humbja e tij është një goditje për teatrin e Korçës dhe për tërë artin shqiptar.”
Kryebashkiaku i Korçës, Sotiraq Filo, e përshkroi Ziçishtin si pjesë të një plejade të shquar artistësh korçarë që kanë dhënë shumë për skenën dhe filmin shqiptar.
Homazhet u zhvilluan në Teatrin “Andon Zako Çajupi”, shtëpia artistike ku Zhani numëronte dhjetëra role të interpretuara me pasion dhe duartrokitur nga publiku. Emri i tij do të mbetet i paharruar si një nga figurat më të ndritura të artit shqiptar.
