Aktori amerikan Robert Carradine është ndarë nga jeta në moshën 71-vjeçare. Lajmi u konfirmua nga familjarët e tij, të cilët bënë të ditur se ai i dha fund jetës pas një përballjeje të gjatë me çrregullimin bipolar.
Vëllai i tij, aktori Keith Carradine, deklaroi se familja shpreson që kjo humbje e dhimbshme të shërbejë për të rritur ndërgjegjësimin mbi shëndetin mendor dhe për të luftuar stigmën që shpesh shoqëron sëmundjet mendore. Carradine vinte nga një familje e njohur artistësh, duke qenë biri i aktorit legjendar John Carradine dhe vëllai i të ndjerit David Carradine.
Karrierën e nisi në vitet ’70 me role në filma si The Cowboys përkrah John Wayne dhe Mean Streets të regjisorit Martin Scorsese. Fama ndërkombëtare erdhi me rolin e Lewis Skolnick në Revenge of the Nerds, një komedi që pati sukses të madh dhe u pasua nga disa vazhdime.
Një brez më i ri e njohu si Sam McGuire në serialin Lizzie McGuire, ku luajti përkrah Hilary Duff. Pas ndarjes së tij nga jeta, Duff dhe kolegu Jake Thomas ndanë mesazhe prekëse në rrjete sociale, duke e kujtuar si një njeri me zemër të madhe dhe humor të veçantë.
Robert Carradine lë pas tre fëmijë, mes tyre edhe aktoren Ever Carradine, si dhe një trashëgimi të pasur artistike që shtrihet në disa dekada film dhe televizion.
