George Clooney dhe bashkëshortja e tij, Amal Clooney, ishin ndër emrat më të komentuar në eventin gala për 50-vjetorin e The King’s Trust në Royal Albert Hall, ku aktori ndau edhe një histori argëtuese nga ditëlindja e tij e fundit.
Aktori hollivudian zbuloi se Amal kishte organizuar një surprizë speciale për 65-vjetorin e tij, duke përfshirë edhe disa nga miqtë e afërt të çiftit. Sipas Amal, gjithçka ishte menduar në detaje, por George nuk humbi rastin për ta kthyer momentin në humor.
“Ata u shfaqën të maskuar si kamerierë,” tregoi ai me të qeshur, ndërsa shtoi se surpriza të tilla mund të jenë “paksa të rrezikshme” në moshën e tij.
“Në 65 vjeç nuk është ide e mirë të trembësh dikë papritur. Mund të përfundosh i shtrirë në tokë,” tha aktori me batutë, duke vazhduar: “Fatmirësisht ende po mbahem në këmbë.”
Gjatë bisedës, çifti foli edhe për jetën familjare dhe mënyrën si po rrisin binjakët e tyre, Alexander dhe Ella. George, besnik stilit të tij plot humor, dha një “këshillë prindërore” duke thënë: “Mos e përzieni verën me drithërat.”
Nga ana tjetër, Amal u shpreh se dëshira e saj më e madhe është që fëmijët të rriten me mendim kritik dhe të mos kenë frikë të bëjnë pyetje apo të sfidojnë gjërat që nuk u duken të drejta.
Në një intervistë të fundit, Clooney foli edhe për karrierën e tij dhe marrëdhënien me filmat e vjetër. Ai pranoi se sot e ka më të vështirë të shohë veten në ekran, por tha se kënaqet kur sheh me fëmijët filmin e animuar “Fantastic Mr. Fox”.
“Ata dëgjojnë vetëm zërin tim dhe kjo e bën gjithçka më argëtuese,” u shpreh ai.
Përveç deklaratave, çifti mori vëmendje edhe për elegancën në tapetin e kuq. Amal shkëlqeu me një fustan të gjatë Alexander McQueen, ndërsa George u paraqit me një kostum klasik navy të kombinuar me këmishë të bardhë dhe kravatë të errët.
