Katie Price ka folur hapur për eksperiencat e saj me kirurgjinë estetike, duke treguar se një nga ndërhyrjet që do të donte të mos e kishte bërë kurrë është Brazilian Butt Lift (BBL).
Modelja dhe ish-ylli televiziv britanik, 47 vjeç, rrëfeu se procedura për zmadhimin e vitheve nuk rezultoi ashtu siç kishte shpresuar. Sipas saj, ndërhyrja jo vetëm që ishte tepër e dhimbshme, por edhe rezultati final nuk e bëri të ndihej mirë me pamjen e saj.
“E provova BBL jashtë vendit, ku përdorin dhjamin e trupit dhe e injektojnë në të pasme. Ishte shumë e dhimbshme dhe nuk më pëlqeu fare si dukej,” është shprehur ajo.
Katie tregoi gjithashtu se ndryshimet në peshë dhe procedurat e tjera estetike që ka kryer ndër vite kanë ndikuar negativisht në formën e trupit të saj, duke bërë që sot t’i shohë disa vendime me pendesë.
Prej vitesh, Price ka qenë një nga personazhet publikë më të komentuar për transformimet estetike. Ajo i është nënshtruar një numri të madh operacionesh, nga zmadhimi i gjoksit te lifting-u i fytyrës dhe trajtime të ndryshme kozmetike.
Ndërkohë, mjekët vazhdojnë të paralajmërojnë për rreziqet që lidhen me procedurën BBL, e cila konsiderohet një nga ndërhyrjet më të rrezikshme në kirurgjinë estetike. Kirurgu Dr. Gerard Lambes ka deklaruar se ndërhyrjet e shpeshta mund ta vendosin trupin nën stres të madh dhe të sjellin pasoja serioze për shëndetin.
Sipas tij, BBL ka një nga nivelet më të larta të komplikacioneve dhe rrezikut në krahasim me procedurat e tjera estetike.
Deklaratat e Katie Price kanë rikthyer debatet në rrjet për standardet e bukurisë dhe presionin që personazhet publikë ndjejnë për të ndryshuar vazhdimisht pamjen e tyre. Vetë ajo ka pranuar në disa intervista se shpesh nuk është ndjerë e lumtur me veten, pavarësisht ndërhyrjeve të shumta estetike.
