Një aksident i rëndë lumor ka tronditur Sudanin verior, ku të paktën 21 persona kanë humbur jetën pasi një anije u përmbys në lumin Nil mbrëmjen e së mërkurës. Lajmi u konfirmua nga autoritetet lokale, të cilat bëjnë me dije se deri tani janë nxjerrë 21 trupa nga uji, ndërsa kërkimet për persona të tjerë të zhdukur vazhdojnë.
Sipas dëshmitarëve që folën për AFP, në bord ndodheshin rreth 30 pasagjerë kur mjeti lundrues u përmbys mes fshatrave Taiba al-Kawad dhe Deim al-Qarai, pranë qytetit Sendi, rreth 200 kilometra në veri të kryeqytetit Khartum. Gjashtë persona arritën të shpëtohen.
Autoritetet e shtetit të Nilit e përshkruan ngjarjen si një “fatkeqësi të rëndë humanitare”, duke theksuar se aksidenti nxjerr në pah rrezikshmërinë e transportit lumor dhe mungesën e standardeve bazë të sigurisë. Ata kërkuan ndërhyrje urgjente nga institucionet përgjegjëse për të parandaluar tragjedi të tjera të ngjashme.
Transporti me anije të vogla private mbetet jetik për shumë qytetarë sudanezë, sidomos në kushtet kur infrastruktura është dëmtuar rëndë nga konflikti i armatosur që prej prillit 2023 mes ushtrisë dhe Forcave të Mbështetjes së Shpejtë. Luftimet kanë sjellë mbyllje rrugësh dhe përkeqësim të theksuar të shërbimeve publike, duke e bërë lëvizjen edhe më të rrezikshme.
Një incident i ngjashëm ndodhi edhe në korrik 2024, kur rreth 20 persona që përpiqeshin t’i shpëtonin përplasjes së armatosur humbën jetën pas mbytjes së një tjetër anijeje në Nil, në shtetin e Shinarit.
