Procesi mësimor në Shkollën Fillore dhe të Mesme të Ulët “Pavarësia” nuk është zhvilluar gjatë dy orëve të para të ditës së sotme, 10 shkurt, si pasojë e një proteste të organizuar nga stafi mësimor. Vendimi është marrë nga Shoqata Sindikale e shkollës, në bashkëpunim me Këshillin Drejtues dhe Këshillin e Prindërve.
Sipas një njoftimi zyrtar të publikuar në Facebook, protesta ka për qëllim të shprehë shqetësimin e mësuesve lidhur me, siç thuhet, përkeqësimin e sjelljes së disa nxënësve gjatë procesit edukativo-arsimor. Sindikata thekson se mësuesit po përballen gjithnjë e më shpesh me dhunë fizike, fyerje, ofendime dhe gjuhë denigruese, duke vënë në rrezik dinjitetin dhe sigurinë e tyre në vendin e punës.
Organizatorët kanë bërë të ditur se pas përfundimit të protestës, mësimi do të vazhdojë normalisht nga ora e tretë, sipas orarit të rregullt.
Në mbështetje të protestës ka dalë edhe Sindikata e Bashkuar e Arsimit, Shkencës dhe Kulturës (SBASHK), e cila kërkon reagim të menjëhershëm nga institucionet përgjegjëse. Sipas SBASHK-së, krijimi i një ambienti të sigurt dhe respektues për mësuesit është i domosdoshëm, pasi pa siguri dhe respekt nuk mund të ketë arsim cilësor.
Ndërkohë, autoritetet kanë konfirmuar se mësuesi i dyshuar për ushtrim dhune ndaj një nxënësi në këtë shkollë është ndaluar për 48 orë. Ngjarja dyshohet të ketë ndodhur të hënën, ndërsa Kryeprokurori i Prishtinës, Zejnullah Gashi, ka bërë të ditur se rasti është në trajtim dhe hetimet janë ende në zhvillim.
