Bota e sporteve ekstreme është në zi pas humbjes tragjike të Pierre Wolnik, dy herë kampion botëror francez në rënie të lirë. 37-vjeçari humbi jetën gjatë një hedhjeje me kostum me krahë (wingsuit) në zonën e Mont Blanc, një nga masivet më sfiduese alpine në Evropë.
Sipas mediave italiane, aksidenti ndodhi të shtunën, kur Wolnik u hodh nga një helikopter për një fluturim teknik që kërkon përgatitje të lartë dhe kontroll maksimal. Gjatë zbritjes, parashuta e tij nuk u hap sipas planit, duke çuar në një përfundim fatal. Ai u rrëzua në zonën e Bossons, në Haute-Savoie, territor i njohur për terrenin e ashpër dhe rreziqet që paraqet për sportistët e disiplinave ajrore.
Ekipet e emergjencës reaguan menjëherë pas sinjalizimit, por pavarësisht ndërhyrjes së shpejtë, nuk mundën ta shpëtonin. Trupi i sportistit u gjet dhe u transportua me helikopter, ndërsa autoritetet kanë nisur hetimet për të sqaruar plotësisht rrethanat e ngjarjes.
Pierre Wolnik ishte një nga emrat më të njohur të parashutizmit francez. Si anëtar i ekipit kombëtar, ai kishte arritur suksese të shumta në garat ndërkombëtare dhe po përgatitej intensivisht për Kampionatin Botëror 2026, një objektiv i rëndësishëm në karrierën e tij.
Lajmi i trishtë u konfirmua edhe nga presidenti i Federatës Franceze të Parashutizmit, Yves-Marie Guillaud, i cili e përshkroi Wolnikun si një talent të rrallë, me shpirt pozitiv dhe pasion të jashtëzakonshëm për sportin që e deshi deri në fund.
