Plisi i bardhë, një simbol mijëvjeçar që ka shoqëruar brezat e shqiptarëve, kërkon sot të njihet nga bota. Përmes një peticioni online, mijëra qytetarë i bëjnë thirrje UNESCO-s të përfshijë këtë artefakt unik në listën e Trashëgimisë Kulturore Jomateriale të Njerëzimit.
Ky kapuç prej leshi të bardhë, punuar me dorë dhe mjeshtëri të lartë, nuk është vetëm një element veshjeje, por një dëshmi e gjallë e historisë, traditës dhe qëndrueshmërisë së identitetit shqiptar. Plisi, i njohur gjithashtu si qeleshe, kësulë apo qylaf në krahinat e ndryshme, ka mbetur një emblemë e pathyeshme kombëtare, duke ruajtur lidhjen mes të kaluarës dhe të tashmes.
Në një kohë kur globalizimi rrezikon të zbehtë identitetet lokale, kjo iniciativë synon që Plisi të mos mbetet vetëm një kujtim në muze apo fotografi të vjetra, por të njihet si një pasuri e vërtetë kulturore globale. Njohja nga UNESCO do të ndihmonte jo vetëm në mbrojtjen e teknikës tradicionale të punimit, por do të japë një shtysë të re edhe për turizmin kulturor në Shqipëri.
Peticioni tashmë ka arritur rreth 8 mijë firma në ditët e para, duke dëshmuar interesin e madh për këtë simbol të gjallë të identitetit shqiptar. Çdo firmë është një hap më pranë që trashëgimia jonë të mbetet e gjallë dhe e respektuar ndërkombëtarisht.
