Aktorja dhe regjisorja e famshme Diane Keaton nderroi jete në Kaliforni, në moshën 79 vjeç, njofton agjencia AP, duke cituar një zëdhënës të familjes, nje lajm ky qe shokoi fansat e saj. Sipas burimeve, nuk janë dhënë detaje të mëtejshme për shkaqet që çuan në vdekjen e saj, pasi familjarët kanë kërkuar privatësi në këtë moment të vështirë.
E lindur në Los Anxheles në vitin 1946, Diane Keaton u bë një nga figurat më të dashura të kinemasë amerikane. Ajo fitoi çmimin Oscar për rolin e saj të paharrueshëm në filmin “Annie Hall”, një kryevepër e regjisorit Woody Allen — artistit me të cilin ndau jo vetëm një bashkëpunim të jashtëzakonshëm, por edhe një lidhje të veçantë personale dhe artistike.
Keaton konsiderohej muza e Woody Allen-it, duke u bërë frymëzim për disa nga filmat e tij më të njohur, si Manhattan, Play It Again, Sam dhe Love and Death. Marrëdhënia e tyre profesionale solli një epokë të re në komeditë romantike të Hollivudit, ku Keaton u shqua për natyralitetin, inteligjencën dhe stilin e saj unik.
Përveç bashkëpunimeve me Allen, ajo shkëlqeu në role të tjera madhore si The Godfather, Something’s Gotta Give dhe Reds, duke dëshmuar një karrierë që zgjati mbi pesë dekada dhe ndikoi në breza të tërë aktorësh.
Yje të shumtë të kinemasë kanë shprehur ngushëllimet e tyre, duke e quajtur Diane Keaton një ikonë të papërsëritshme dhe një femër që e jetoi artin me guxim e finesë. Trashëgimia e saj artistike mbetet një kujtesë sesi stili, inteligjenca dhe ndjeshmëria mund të bashkëjetojnë në të njëjtën shpirt!
