Ylli i muzikës pop Lady Gaga duket se është gati të hedhë një hap të ri të rëndësishëm në jetën personale. Artistja ka zbuluar se së shpejti do të martohet me të fejuarin e saj, sipërmarrësin Michael Polansky, me të cilin është në një lidhje prej disa vitesh.
Romanca mes tyre nisi në fund të vitit 2019, ndërsa lidhjen e bënë publike në fillim të vitit 2020 përmes rrjeteve sociale. Që prej asaj kohe, çifti është shfaqur shpesh së bashku në evente dhe momente të ndryshme të jetës së përditshme.
Gjatë një lidhjeje telefonike në transmetimin Romantic Radio TikTok Live të Bruno Mars, këngëtarja 39-vjeçare foli hapur për planet e saj të afërta, duke zbuluar se martesa është shumë pranë.
“Unë dhe i fejuari im udhëtojmë gjatë gjithë vitit, por së shpejti do të martohemi. Shpresonim që të mund të zgjidhje një këngë të veçantë për ne,” tha ajo gjatë bisedës.
Bruno Mars, i cili së fundmi ka bashkëpunuar me Lady Gaga në këngën Die With A Smile, vendosi t’i dedikojë çiftit një këngë nga projekti i tij i ri muzikor, albumi The Romantic.
“Nëse po kërkon një këngë për t’ia dedikuar bashkëshortit tënd, do të të sugjeroja nga albumi im i ri të zgjedhësh këngën Risk It All, këngën e parë. Kështu që dua t’ia dedikoj Lady Gagës dhe të fejuarit të saj. Michael, kjo është edhe për ty,” u shpreh artisti.
Pak muaj më parë, gjatë një interviste me Stephen Colbert, këngëtarja kishte folur edhe për planet e saj për të krijuar familje. Ajo tregoi se një nga dëshirat më të mëdha është të bëhet nënë.
“Do të doja të bëja shumë gjëra, po, të gjitha këto. Por ajo që dua vërtet është të bëhem nënë. Ky është roli im i radhës kryesor, shpresoj,” kishte thënë ajo.
Artistja fituese e çmimeve Grammy Awards ka folur shpesh me shumë dashuri për partnerin e saj, duke e përshkruar si mbështetjen më të madhe në jetën e saj.
“Ai është miku im më i mirë në të gjithë botën,” tha Gaga, duke shtuar se ndihet “më e fuqizuar si grua në muzikë kur kam një partner të mrekullueshëm që më mbështet çdo ditë”.
Duke kujtuar takimin e tyre të parë, ajo shtoi: “Më la shumë përshtypje që në momentin e parë që e takova. Mendoj se ai gjithmonë më ka parë vërtet ashtu siç jam dhe besoj se edhe unë gjithmonë e kam parë vërtet atë.”
