Kanye West deklaron publikisht se po heq dorë nga deklaratat antisemitike, vetëm disa orë pasi dy punonjës të Ambasadës Izraelite që pritet të fejoheshin u vranë me armë përpara Muzeut Hebre të Kryeqytetit.
“Unë kam mbaruar me antisemitizmin,” shkroi Ye, vetëm dy javë pasi publikoi një këngë të titulluar “Heil Hitler” dhe duke shitur bluza me svastika. “I dua të gjithë njerëzit. Zot, më fal për dhimbjen që kam shkaktuar. I fal ata që më kanë shkaktuar dhimbje. Faleminderit Zot.”
Ye nuk e lidh drejtpërdrejt këtë ndryshim me vrasje e Yaron Lischinsky, 28 vjeç, dhe Sarah Milgrim, 26 vjeç, punonjës të Ambasadës së Izraelit që po largoheshin nga një event në Muzeun Hebre në Washington DC natën e mëparshme.
Në vend të kësaj, ai sugjeroi se ndryshimi erdhi sepse “thjesht mora një telefonatë FaceTime nga fëmijët e mi dhe dua ta shpëtoj botën sërish…”
Liga Anti-Shpifje (ADL) tha se nuk e beson ndjeshmërinë apo sinqeritetin e kësaj ndjese.
“E kemi parë këtë lloj ‘kërkimi faljeje’ më parë nga Kanye, vetëm që ai të tërhiqet sërish dhe sërish,” tha një zëdhënës për Billboard.
“Ndërsa komuniteti hebre po vajton humbjen e dy jetëve në një tjetër sulm antisemitik, do të duhet shumë më tepër se disa postime në rrjetet sociale për të riparuar dëmet e fjalimeve të tij të mbushura me urrejtje.”
Që nga viti 2022, Ye ka bërë deklarata të shumta antisemitike, duke shkaktuar reagime të ashpra në të gjithë botën dhe duke humbur kontrata të mëdha biznesi.
