Moderatori i njohur britanik Jeremy Clarkson ka ndarë me publikun një lajm të vështirë, duke bërë të ditur se po përballet me kancer në prostatë. Zbulimi u bë gjatë sezonit të ri të emisionit të tij “Clarkson’s Farm”, ku ai foli hapur për gjendjen shëndetësore para bashkëpunëtorëve të tij, Kaleb Cooper dhe Charlie Ireland.
66-vjeçari tregoi se diagnoza iu konfirmua pas një biopsie të kryer në muajin maj, ndërsa e përshkroi sëmundjen si agresive. Megjithatë, ai theksoi se kanceri është zbuluar në një fazë të hershme, gjë që rrit shanset për një trajtim të suksesshëm.
“U largova për pak kohë për të bërë analizat dhe pas biopsisë mora lajmin se bëhej fjalë për kancer. Është agresiv, por për fat të mirë u kap shumë herët”, u shpreh Clarkson.
Ai zbuloi gjithashtu se i është nënshtruar një ndërhyrjeje kirurgjikale, gjatë së cilës është hequr një pjesë e prostatës, ndërsa aktualisht është në pritje të rezultateve përfundimtare të trajtimit.
Për shkak të gjendjes së tij, prezantuesi do të reduktojë përkohësisht angazhimet profesionale, por ka shprehur besimin se do të rikuperohet plotësisht.
Në episodet e fundit të sezonit, Clarkson shfaqet i shtruar në spital pas trajtimit, duke pranuar se disa komplikime i zgjatën qëndrimin nën kujdesin e mjekëve.
Lajmi ka ngjallur reagime të shumta, pasi Jeremy Clarkson mbetet një nga figurat më të njohura të televizionit britanik, i famshëm për programet “Top Gear”, “The Grand Tour” dhe si prezantues i “Who Wants To Be A Millionaire?”.
