Jane Fonda ka komentuar me nota humori momentin e homazhit për Robert Redford në ceremoninë e Oscars, duke lënë të kuptohet se ajo do të kishte dashur të ishte në vend të Barbra Streisand në skenë.
Gjatë një feste pas ndarjes së çmimeve, aktorja 88-vjeçare bëri shaka për zgjedhjen e Streisand, duke theksuar se ajo ka pasur një bashkëpunim shumë më të gjatë me Redfordin.
“Pse ishte Streisand ajo që foli për të? Ajo ka bërë vetëm një film me të, ndërsa unë kam bërë katër. Kam më shumë për të treguar,” u shpreh Fonda me humor.
Në ceremoninë e 98-të të Oscars, gjatë segmentit “In Memoriam”, Barbra Streisand u ngjit në skenë për të nderuar aktorin legjendar, i cili u nda nga jeta më 16 shtator 2025 në moshën 89-vjeçare.
Fonda, nga ana e saj, rikujtoi lidhjen e gjatë profesionale me Redfordin, me të cilin ka ndarë ekranin në katër filma: The Tall Story (1960), The Chase (1966), Barefoot in the Park (1967) dhe Our Souls at Night (2017).
Pavarësisht batutave, ajo nuk kurseu vlerësimet për mikun e saj të ndjerë, duke e përshkruar si “një nga njerëzit më të bukur” dhe duke pranuar se gjithmonë ka pasur një ndjenjë të veçantë për të. Fonda vlerësoi gjithashtu ndikimin e tij në industrinë e filmit, duke theksuar se ai kontribuoi ndjeshëm në zhvillimin e kinemasë së pavarur.
Ndërkohë, Streisand, e cila ka luajtur me Redfordin në filmin The Way We Were (1973), mbajti një homazh emocional në skenë, të shoqëruar edhe me një interpretim live të këngës ikonike me të njëjtin titull.
Më herët, Fonda kishte reaguar edhe për ndarjen nga jeta të Redfordit, duke e cilësuar si një humbje të madhe personale dhe profesionale. Ajo theksoi se ai ka qenë një figurë shumë e rëndësishme në jetën e saj, ndërsa shtoi se ky vit ka qenë i rëndë për Hollywood-in, me humbjen e shumë emrave të mëdhenj të industrisë.
