Shtëpia e aktorit Brad Pitt në Los Angeles është grabitur nga disa hajdutë. Tre persona hynë me forcë në banesën në Los Feliz përmes një dritareje dhe e bastisën, sipas Departamentit të Policisë së Los Angeles.
Policia nuk konfirmoi që shtëpia i përkiste aktorit fitues të çmimit Oscar, por adresa përputhej me atë të banesës që Brad Pitt bleu në vitin 2023. Autoritetet thanë se të dyshuarit ikën me sende të vjedhura, megjithëse nuk është e qartë se çfarë është marrë. Aktori nuk ishte në shtëpi në kohën e grabitjes, raportuan mediat amerikane.
Pitt ishte në Mbretërinë e Bashkuar në fillim të kësaj jave për premierën në Londër të filmit të tij të ri F1, i cili do të dalë të premten. Ai u shoqërua nga ylli i Hollivudit Tom Cruise dhe Lewis Hamilton, i cili ka shtatë tituj kampionë botërorë në Formula 1.
Autoritetet thanë se vjedhja ndodhi rreth orës lokale 22:30 të mërkurën. Policia e Los Anxhelosit nuk e konfirmoi vlerën e sendeve të vjedhura. Shtëpia e madhe me tre dhoma gjumi ndodhet pak jashtë Griffith Park, është e rrethuar nga një gardh i madh dhe gjelbërim që e mbron shtëpinë nga sytë e publikut. Grabitja vjen pas raportimeve të tjera në qytet që kanë shënjestruar personazhe të tjerë të famshëm, përfshirë Nicole Kidman dhe Keith Urban.
Muajin e kaluar, një burrë u arrestua gjithashtu me akuza për përndjekje dhe vandalizëm, pasi dyshohet se përplasi automjetin e tij në portën e shtëpisë së ish-gruas së Pitt, Jennifer Aniston.
