Futbollisti i njohur shqiptar Edon Zhegrova ka përjetuar një nga momentet më të bukura të jetës së tij personale, pasi është bërë baba për herë të parë.
Lajmi u bë publik nga klubi italian Juventus, i cili përmes një postimi në rrjetin social X (Twitter) i dërgoi urime futbollistit për ardhjen në jetë të fëmijës së tij të parë.
“Urime Edon Zhegrovës për lindjen e fëmijës së tij të parë, Mars!”, shkruhej në mesazhin e klubit, duke ndarë me ndjekësit gëzimin për këtë moment të veçantë në jetën e lojtarit.
Sipas informacioneve të publikuara, djali i porsalindur është quajtur Mars, një emër që duket se lidhet me muajin e lindjes, marsin. Kjo zgjedhje simbolike mendohet se ka frymëzuar futbollistin dhe partneren e tij për emrin e të birit.
Sa i përket jetës private, partnerja e Zhegrovës preferon të qëndrojë larg vëmendjes së mediave dhe nuk ka shumë detaje publike rreth saj.
Ky moment shënon një kapitull të ri në jetën e futbollistit, i cili përveç suksesit në karrierën sportive, tashmë po përjeton edhe emocionin e të qenit prind për herë të parë. Lajmi është pritur me shumë urime nga tifozët dhe ndjekësit e tij në rrjetet sociale.
