Një ngjarje tronditëse ka ndodhur në SHBA, ku autoritetet në Los Anxhelos kanë bërë të ditur se artisti i njohur D4vd (emri i vërtetë David Anthony Burke), 21 vjeç, është arrestuar në kuadër të hetimeve për vdekjen e një vajze 14-vjeçare, Celeste Rivas Hernandez, e cila u gjet e pajetë në një automjet Tesla të konfiskuar që rezultonte i regjistruar në emër të tij.
Sipas Departamentit të Policisë së Los Anxhelosit (LAPD), Burke është ndaluar të enjten dhe po mbahet pa të drejtë lirimi me kusht, ndërsa çështja pritet t’i kalojë Prokurorisë së Qarkut për shqyrtim dhe vendim mbi ngritjen e mundshme të akuzave.
Prokurorët kanë deklaruar se janë në dijeni të arrestimit dhe se materiali hetimor do të analizohet nga njësia për Krime të Rënda, e cila do të përcaktojë nëse ka prova të mjaftueshme për procedim penal. Deri më tani, autoritetet theksojnë se hetimi është ende në zhvillim dhe nuk janë publikuar detaje shtesë.
Sipas burimeve policore, artisti është arrestuar mbi bazën e një urdhri të lëshuar për arsye të dyshimit të arsyeshëm dhe thuhet se nuk ka bashkëpunuar plotësisht me hetuesit, megjithëse mbrojtja e tij i ka hedhur poshtë këto pretendime.
Avokatët e Burke kanë deklaruar se klienti i tyre mohon çdo përfshirje në vdekjen e adoleshentes dhe theksojnë se nuk është ngritur ende asnjë aktakuzë zyrtare apo vendim nga një juri e madhe, duke shtuar se ai do të mbrohet fuqishëm në procesin ligjor.
Trupi i vajzës u gjet në muajin shtator në bagazhin e një makine të tërhequr nga autoritetet, ndërsa shkaku i vdekjes mbetet ende nën hetim. Policia ka bërë të ditur se rasti po trajtohet si hetim për vrasje, por pa përfundime zyrtare deri në këtë fazë.
Hetimet vijojnë, ndërsa pritet që prokuroria të japë një vendim fillestar mbi çështjen në ditët në vijim.
