Pas përfundimit të Kupës së Botës 2026, Lionel Messi është kthyer në Argjentinë, duke zgjedhur të kalojë ditët e para larg vëmendjes publike në vendlindjen e tij.
Kapiteni i Argjentinës udhëtoi nga Miami drejt Rosarios së bashku me bashkëshorten Antonela Roccuzzo dhe tre djemtë e tyre. Më pas, familja u drejtua për në rezidencën e tyre pranë Funes, zonë në periferi të Rosarios, ku Messi zakonisht qëndron sa herë kthehet në atdhe.
Ndryshe nga pjesa tjetër e kombëtares, e cila u prit me entuziazëm nga mijëra tifozë në Buenos Aires një ditë më parë, rikthimi i 39-vjeçarit u zhvillua larg ceremonive dhe pritjeve publike.
Vetëm pak orë më herët, Messi reagoi për herë të parë pas humbjes në finalen ndaj Spanjës. Në një postim në rrjetet sociale, ai pranoi se zhgënjimi ishte i madh, duke shkruar se “dhimbja është shumë e fortë” dhe se do të duhet kohë që ajo plagë të shërohet, ndërsa falënderoi gjithashtu të gjithë për mbështetjen.
Ndërkohë, diskutimet për të ardhmen e tij me fanellën e Argjentinës vazhdojnë të jenë të hapura. Ende nuk dihet nëse Messi do t’i japë fund karrierës ndërkombëtare apo do të synojë të vazhdojë deri në Botërorin e vitit 2030, turne që do të ketë një domethënie të veçantë për Argjentinën në kuadër të 100-vjetorit të Kupës së Botës.
Ditët në Rosario pritet t’i shërbejnë si një periudhë reflektimi, përpara se legjenda argjentinase të marrë një vendim për kapitullin e ardhshëm të karrierës së tij me kombëtaren.
