Ndërsa shumica e njerëzve ëndërrojnë një shtëpi pranë detit, amerikaneja Susan Parker e ka çuar këtë ide në një tjetër nivel. Prej 12 vitesh, ajo jeton në një anije lundruese që udhëton vazhdimisht nëpër botë.
68-vjeçarja vendosi të shesë shtëpinë e saj tradicionale pas daljes në pension dhe investoi kursimet në një apartament të vogël brenda një anijeje turistike. Që atëherë, ajo ka vizituar mbi 100 vende në pesë kontinente.
“Paguaj më pak sesa do të paguaja për një shtëpi, energji, ushqime dhe udhëtime të ndara. Për mua, kjo është mënyra ideale e jetesës”, ka treguar ajo për mediat amerikane.
Jeta në anije nuk është vetëm pushim. Banorët kanë akses në restorante, palestër, bibliotekë, aktivitete sociale dhe shërbime mjekësore. Shumë prej tyre janë pensionistë që kanë zgjedhur të jetojnë vazhdimisht në det.
Ekspertët thonë se ky trend po bëhet gjithnjë e më popullor mes personave që kërkojnë një stil jetese më fleksibël dhe më pak të kushtueshëm sesa mbajtja e një shtëpie të zakonshme.
Për Susan, zgjedhja nuk ka qenë e vështirë: “Disa njerëz ndërrojnë shtëpi çdo disa vite. Unë ndërroj vendin ku zgjohem çdo javë.”
