Muzeu Metropolitan i Artit (Met) ka zbuluar temën e ekspozitës së ardhshme të Institutit të Kostumeve dhe, rrjedhimisht, të mbrëmjes më të shkëlqyer dhe më të pritur të modës, Met Gala 2026: “Costume Art” (Arti i Kostumit/Veshjes).
Ekspozita synon të japë një përgjigje përfundimtare në debatin nëse moda është art. Ajo do të hapet për publikun më 10 maj, duke bashkuar gati 200 vepra arti me rreth 200 veshje dhe aksesorë.
View this post on Instagram
Andrew Bolton, kuratori i Institutit të Kostumeve, shpjegoi se titulli i referohet historisë së vetë Institutit dhe theksoi pikën kryesore të shfaqjes: moda e fiton statusin e artit "për shkak, dhe jo pavarësisht, lidhjes së saj me trupin."
Ndërsa ekspozitat e modës zakonisht e shkëpusin veshjen nga forma njerëzore, Bolton theksoi se kjo shfaqje do të theksojë atë lidhje. Qëllimi është ta ngrejë veshjen në të njëjtin nivel me një statujë greke apo një vepër të Albrecht Dürer.
Përveç temës, lajmi i madh është zgjerimi i hapësirës ekspozuese. Dymbëdhjetë mijë metra katrorë hapësirë do t’i dedikohen Institutit të Kostumeve, menjëherë pranë Sallës së Madhe të Muzeut. Galeria e re do të mbajë emrin e Condé M. Nast, themeluesit të kompanisë që publikon revistën Vogue.
Kjo hapësirë e re, e bërë e mundur falë një donacioni nga Condé Nast, sipas Bolton, “njeh rolin qendror të modës jo vetëm brenda Met, por brenda kulturës.”
Sponsorët e Met Gala 2026 janë marka franceze luksoze Saint Laurent, Condé Nast dhe çifti Jeff Bezos dhe Lauren Sánchez Bezos. Kjo mbështetje financiare tregon përpjekjen e fundit të çiftit për t'u njohur si figura kyçe në botën e stilit.
Met Gala, e cila zhvillohet të hënën e parë të muajit maj dhe e transformuar nga Anna Wintour në një spektakël global, shërben si i vetmi mbledhës fondesh për Institutin e Kostumeve (për ekspozitat, blerjet dhe mirëmbajtjen). Kjo është jetike, pasi Instituti nuk merr fonde nga buxheti i përgjithshëm i Met. Vitin e kaluar, Gala-ja arriti të mbledhë plot 31 milionë dollarë.
Me temën "Costume Art", organizatorët dëshirojnë të sigurojnë që publiku të kuptojë se moda kërkon po aq përpjekje dhe gjenialitet sa një kryevepër e Rilindjes.
