Zendaya duket se po përgatitet të bëjë një hap pas nga industria e filmit, pas një periudhe intensive me projekte të njëpasnjëshme. Aktorja e vlerësuar me çmimin Emmy ka treguar se, pas një viti të mbushur me angazhime të mëdha, synon të marrë një pushim të përkohshëm nga ekrani.
Viti 2026 pritet të jetë ndër më të ngarkuarit në karrierën e saj, me pjesëmarrje në projekte të rëndësishme si Dune: Part Three, Spider-Man: Brand New Day, The Odyssey dhe sezoni i tretë i Euphoria. Pikërisht pas kësaj vale angazhimesh, Zendaya ka lënë të kuptohet se do të tërhiqet për pak kohë nga vëmendja publike.
“Pas gjithë kësaj, do të zhdukem për një periudhë. Kam nevojë të qëndroj pak larg,” është shprehur ajo në një intervistë, duke shtuar me humor se shpreson që publiku të mos ngopet me praninë e saj.
Megjithatë, kjo nuk do të thotë një largim i gjatë nga ekrani. Aktorja pritet të rikthehet në vitin 2027 me filmin Shrek 5, ku do të jetë pjesë e një kasti të njohur ndërkombëtar.
Në të njëjtën kohë, jeta e saj personale ka qenë në qendër të vëmendjes. Në rrjetet sociale kanë qarkulluar spekulime për një martesë të mundshme me partnerin e saj, aktorin Tom Holland, të nxitura nga një unazë që ajo është parë të mbajë dhe nga disa imazhe të krijuara me inteligjencë artificiale.
Zendaya i ka hedhur poshtë këto pretendime, duke sqaruar se fotot janë të rreme dhe kanë çuar në keqinformim. Çifti, që e bëri publike lidhjen në vitin 2021, nuk ka reaguar zyrtarisht për thashethemet e fundit.
