Pedagogia e Universitetit të Arteve, Roberta Mone, ka qenë e ftuar ditën në emisionin Shqipëria Live në Top Channel, ku ka komentuar për ish-studenten e saj, Selin Bollati, aktualisht pjesë e Big Brother VIP 5.
Mone e përshkroi Selinin si një vajzë luftarake, këmbëngulëse dhe shumë të fortë, duke theksuar se ajo është një artiste e formuar, tek e cila gjenden vlerat më të mira të një artisti të ri. Ajo u shpreh se e ka pasur studente për pesë vite dhe e njeh nga afër zhvillimin e saj artistik.
Gjatë intervistës, ajo u ndal edhe te debati për një udhëtim në Dubai, i përmendur brenda shtëpisë së “Big Brother VIP”. Mone sqaroi se ky udhëtim nuk është bërë me Universitetin e Arteve, por me Ansambli Shtetëror të Këngëve dhe Valleve, duke e cilësuar si një aktivitet zyrtar shtetëror.
Sipas saj, ajo ka qenë në dijeni të këtij udhëtimi dhe ka pasur informacion për aktivitetet artistike të studentëve të saj. “E dija që Selin do të shkonte në këtë tur dhe do të përfaqësonte diçka të bukur artistikisht,” u shpreh ajo, duke shtuar se ka pasur edhe foto të grupit artistik në këtë aktivitet.
Mone gjithashtu reagoi ndaj fyerjeve të bëra në reality show, duke theksuar se formate të tilla duhet të promovojnë vlera dhe mesazhe pozitive për të rinjtë, ndërsa shprehu keqardhje për sulmet ndaj Selinit.
Në përfundim, ajo i dha mbështetje të plotë ish-studentes së saj, duke e cilësuar si një nga pretendentet për fitore në këtë edicion të “Big Brother VIP”. Sipas saj, një fitore e Selinit do të ishte një hap i rëndësishëm drejt realizimit të ëndrrave të saj artistike dhe hapjes së rrugëve të reja profesionale.
