Aktori i njohur Timothée Chalamet është vënë në qendër të kritikave nga artistë të operës dhe baletit, pas një deklarate ku ai sugjeroi se këto forma arti nuk tërheqin më interesin e publikut.
Reagimet nuk vonuan. Sopranoja amerikane Isabel Leonard reagoi në Instagram, duke e cilësuar komentin e aktorit si të kufizuar dhe të papjekur. Ajo u shpreh se ishte e habitur që një artist kaq i suksesshëm mund të shfaqte një qasje kaq të ngushtë ndaj formave të tjera të artit, ndërsa vetë e konsideron veten pjesë të botës artistike.
Debatit iu bashkua edhe mezzo-sopranoja kanadeze Deepa Johnny, e cila e quajti qëndrimin e tij zhgënjyes. Sipas saj, përvoja e teatrit live, baletit dhe operës mbetet një nga format më magjike të artit skenik.
Kritika erdhi edhe nga tenori irlandez Seán Tester, i cili theksoi se deklarata të tilla shpesh lindin kur popullariteti ngatërrohet me vlerën e vërtetë kulturore të një arti.
Komentet e Chalamet u bënë gjatë një bisede publike me aktorin Matthew McConaughey në një aktivitet të organizuar nga CNN dhe Variety. Gjatë diskutimit, aktori u shpreh se e respekton përpjekjen për të ruajtur disa forma arti, por shtoi se personalisht nuk do të donte të punonte në projekte që përpiqen t’i mbajnë ato gjallë kur, sipas tij, publiku nuk tregon më interes.
Ai e mbylli komentin me humor, duke pranuar se ndoshta me këtë deklaratë mund të ketë “humbur disa shikues”.
Ndërkohë, institucioni britanik Royal Ballet and Opera reagoi gjithashtu përmes një deklarate, duke theksuar se opera dhe baleti kanë luajtur historikisht një rol të rëndësishëm në zhvillimin e arteve të tjera. Sipas tyre, këto forma arti kanë ndikuar dhe frymëzuar fusha si teatri, filmi, muzika bashkëkohore dhe moda.
