Në një intervistë të mbushur me emocione, Ivanka Trump ka hapur zemrën për disa nga periudhat më të vështira të jetës së saj, duke ndarë dhimbjen për humbjen e nënës, sfidat shëndetësore të bashkëshortit dhe frikën e përjetuar gjatë atentatit ndaj babait të saj, Donald Trump.
Duke folur në podcastin “Ditari i një CEO”, ajo e përshkroi nënën e saj, Ivana Trump, si një grua të fortë dhe energjike, humbja e së cilës e ka tronditur thellë, veçanërisht për shkak të natyrës së papritur të largimit nga jeta pas COVID-it.
Ivanka ndau gjithashtu rolin e rëndësishëm të gjyshes së saj, Marie Zelníčková, e cila jeton me familjen në Florida dhe përkujdeset për nipërit, duke mbajtur gjallë kujtimet për Ivanën përmes historive që u rrëfen atyre.
Një kapitull i vështirë për familjen ishte edhe beteja e Jared Kushner me kancerin. Ajo tregoi se bashkëshorti i saj iu nënshtrua një operacioni për heqjen e një tumori në qafë gjatë kohës që ishte në detyrë në Shtëpinë e Bardhë, si dhe një ndërhyrjeje tjetër në tiroide në vitin 2022.
Ivanka rikujtoi me emocione edhe atentatin ndaj të atit në Butler, Pennsylvania, një moment që e përjetoi përmes ekranit, ndërsa ishte me fëmijët. Frika e madhe u shndërrua në lehtësim kur mësoi se ai ishte jashtë rrezikut.
Në përfundim, ajo theksoi se këto përvoja e kanë bërë të kuptojë sa e brishtë është jeta dhe rëndësinë e të mos marrë asgjë si të mirëqenë. Ivanka shtoi se ka zgjedhur të falë personin që tentoi sulmin, duke e cilësuar faljen si një rrugë të vështirë, por të nevojshme për të ecur përpara.
