Bill Gates do të paraqitet më 10 qershor përpara një komiteti të United States Congress që po heton çështjen e lidhur me Jeffrey Epstein, bëjnë me dije burime për Politico.
Bashkëthemeluesi i Microsoft do të japë dëshmi me dyer të mbyllura, ndërsa ligjvënësit pritet ta pyesin për raportin që ka pasur me financierin, i cili u akuzua për abuzime seksuale ndaj të miturve dhe ndërroi jetë në burg përpara se të përballej me gjyqin.
Përfaqësues të Gates kanë deklaruar se ai është i gatshëm të bashkëpunojë dhe e sheh dëshminë si një mundësi për të sqaruar çdo paqartësi. “Ai nuk ka qenë kurrë i përfshirë në aktivitetet kriminale të Epstein dhe është i gatshëm t’u përgjigjet pyetjeve të komitetit,” thuhet në reagim.
Në muajin shkurt, Gates e ka cilësuar lidhjen e tij me Epstein si “një gabim të madh”, duke pranuar gjithashtu para anëtarëve të fondacionit të tij se kishte pasur marrëdhënie jashtëmartesore, ndërsa ka mohuar çdo përfshirje në veprimtari të paligjshme.
“Nuk kam bërë asgjë të paligjshme dhe nuk kam parë asgjë të tillë,” është shprehur ai, sipas raportimeve të The Wall Street Journal.
Sipas deklarimeve të tij, kontaktet me Epstein kanë nisur në vitin 2011, disa vite pasi ky i fundit ishte shpallur fajtor për një çështje që lidhej me shfrytëzimin e një të miture.
Ndërkohë, një email i publikuar nga autoritetet amerikane përmend pretendime për lidhje personale të Gates, megjithatë dokumenti në fjalë duket se nuk është dërguar asnjëherë.
