Jennifer Lopez dhe Brett Goldstein kanë vendosur t’u japin fund spekulimeve që i lidhin romantikisht, pas komenteve të shumta që kanë qarkulluar gjatë promovimit të filmit të tyre të ri, Office Romance.
Të ftuar në emisionin Today, dy aktorët u përballën me pyetjet rreth raportit të tyre, ndërsa moderatorja Savannah Guthrie kërkoi të dinte nëse kimia që shfaqin së bashku fshihet edhe jashtë kamerave.
Lopez e mohoi kategorikisht këtë mundësi, duke theksuar se shpesh bëhet objekt i thashethemeve sa herë që bashkëpunon me një koleg në një projekt të ri.
“Kjo ndodh vazhdimisht. Njerëzit krijojnë histori sa herë që më shohin duke punuar ose duke kaluar kohë me dikë,” u shpreh këngëtarja dhe aktorja.
Nga ana e tij, Goldstein e mori situatën me sportivitet, duke bërë shaka se kushdo që kalon kohë pranë Jennifer Lopez përfundon shpejt në qendër të zërave për romancë.
Kur u pyet sërish për këtë çështje, Lopez përsëriti se nuk ka asnjë bazë për këto aludime dhe kujtoi se ndër vite është përballur me thashetheme të ngjashme edhe me figura të tjera të njohura të Hollywood-it.
Spekulimet u shtuan gjatë fushatës promocionale të Office Romance, komedia romantike e Netflix ku Lopez luan rolin e një drejtueseje kompanie që përfshihet në një histori dashurie me një punonjës të ri, të interpretuar nga Goldstein.
Megjithatë, të dy artistët theksuan se raporti i tyre mbetet strikt profesional dhe se kimia që publiku ka vënë re lidhet vetëm me rolet që interpretojnë në ekran.
