Dasma e zhvilluar mes Brikenës dhe Mateos në shtëpinë e Big Brother VIP ka sjellë përplasje të forta mes banorëve gjatë prime-it të fundit, duke ndarë shtëpinë në dy kampe.
Një pjesë e banorëve, mes tyre Juela dhe Miri, kanë shprehur dyshime për sinqeritetin e marrëdhënies, duke lënë të kuptohet se martesa mund të jetë përdorur si strategji për të siguruar një vend në finale. Sipas tyre, afrimiteti i çiftit ka qenë i paqëndrueshëm gjatë gjithë rrugëtimit dhe dasma erdhi në një moment kyç të lojës.
Juela theksoi se ceremonia kishte energji pozitive, por sipas saj mungonin emocionet e forta mes çiftit, ndërsa shtoi se kjo lëvizje mund të ketë qenë e menduar për lojën. Në të njëjtën linjë, Miri e cilësoi dasmën si “hapin e fundit” drejt finales, duke nënvizuar se kjo situatë i shërben më shumë Brikenës.
Nga ana tjetër, vetë Brikena dhe Mateo e mbrojtën lidhjen e tyre, duke këmbëngulur se gjithçka ka ardhur natyrshëm. Mateo u shpreh se përjetimi i momenteve të tyre në shtëpi, nga debatet te afrimiteti, ka qenë i veçantë dhe përfundimi me dasmë ishte më i bukuri i mundshëm.
Brikena, nga ana e saj, u shpreh krenare për marrëdhënien që ka ndërtuar, duke theksuar se në jetë shpesh ndodh që njerëzit të afrohen gradualisht dhe të ndërtojnë diçka të fortë me kalimin e kohës.
Ndërkohë, disa banorë të tjerë kanë mbajtur një qëndrim më neutral apo mbështetës. Selin vlerësoi çiftin duke thënë se kanë qenë në momentin e tyre më të mirë, ndërsa Edisa uroi që gjithçka të jetë e sinqertë. Nga ana tjetër, Rogerti ngriti dyshime duke e cilësuar Brikenën si shumë të fokusuar për të arritur finalen.
Debati mbetet i hapur, ndërsa marrëdhënia e çiftit vijon të jetë një nga temat më të komentuara brenda shtëpisë.
