Artisti shqiptar me famë botërore Ermal Meta ishte i ftuari special në finalen e “X Factor Kids Albania”, ku u prit me duartrokitje të shumta nga publiku dhe atmosferë mjaft emocionuese.
Në skenë, ai u vlerësua nga moderatorja, e cila theksoi thjeshtësinë e tij pavarësisht suksesit ndërkombëtar. Ajo u shpreh se Meta është shembulli i artistit që, edhe kur arrin majat, mbetet me “këmbët në tokë” dhe ruan natyrën e tij njerëzore.
Në përgjigje të këtyre fjalëve, Ermal Meta tha me modesti: “Unë këmbët i kam patur gjithmonë në tokë, sepse kam ecur shumë përpara se të fluturoja.”
Gjatë intervistës, u kujtua edhe një moment i veçantë nga karriera e tij, kur legjenda e muzikës italiane Adriano Celentano e kishte vlerësuar publikisht pas performancës në Festivalin e Sanremo Music Festival, duke e komplimentuar për baladën “Stella stellina” dhe duke shkruar se kënga ishte aq e bukur sa ishte pothuajse e pamundur të mos fitonte.
Meta rrëfeu se në fillim mendoi se ishte ndonjë faqe fansash, por më pas komunikoi me Celentanon pas disa ditësh dhe kuptoi që ishte e vërtetë: “Në fillim mendova se ishte ndonjë faqe fansash. Më pas komunikova me të pas disa ditësh. Ishte një medalje shumë më e rëndësishme për mua.”
Meta foli gjithashtu për planet e tij artistike, duke zbuluar se po tenton të shkruajë projekte edhe në gjuhën shqipe. Ai pranoi se ky është një proces sfidues për të, por tha se është një dëshirë që e ka prej kohësh dhe se po kërkon edhe ndihmë për ta realizuar.
Mbrëmja u mbyll në një atmosferë të ngrohtë artistike, ku edhe këngëtarja Fifi u përfshi në diskutim, duke i ofruar ide dhe mbështetje për projektet e tij të ardhshme në shqip.
