Një nënë dhe vajza e saj janë arrestuar nga policia australiane për një skemë mashtrimi që dyshohet se ka kapur vlerën e 46 milionë dollarëve, duke prekur kryesisht gra nga komuniteti vietnamez në Sydney.
53-vjeçarja, e njohur si fallxhore dhe mësuese feng shui, dhe vajza e saj 25-vjeçare, u kapën gjatë një bastisjeje në një rezidencë luksoze në Dover Heights. Sipas hetimeve, nëna përdorte ndikimin dhe besimin që kishte tek komuniteti për të bindur viktimat të merrnin kredi të mëdha financiare, ndërsa një pjesë të parave i mbante për vete. Ajo premtonte se klientet e saj do të takonin një “miliarder” në të ardhmen e tyre.
Hetuesit sekuestruan dokumente financiare, telefona celularë, pajisje elektronike, çanta luksoze dhe një shufër ari 40-gramëshe. Sipas policisë, asetet totale të lidhura me rastin arrijnë deri në 60 milionë dollarë.
53-vjeçarja tani përballet me 39 akuza, duke përfshirë drejtimin e aktiviteteve të një grupi kriminal dhe përfitime të paligjshme financiare. Vajza e saj u akuzua për shtatë vepra penale, duke përfshirë marrjen e të ardhurave nga krimi dhe pjesëmarrjen në aktivitetet kriminale të grupit.
Hetimi gjithashtu ka nxjerrë në pah një grup kriminal të lidhur, i cili përdorte identitete të rreme për të marrë kredi për makina luksoze që nuk ekzistonin, dhe me paratë e fituara blinin prona të shtrenjta në Sydney. Autoritetet dyshojnë se nënë e bijë ishin pjesë e kësaj skeme të sofistikuar.
Shef i policisë nga skuadra e Krimeve Financiare tha se hetuesit po punojnë intensivisht për të zbuluar të gjitha aspektet e këtij rrjeti kriminal dhe për të rikuperuar asetet e përfshira në mashtrim.
