Një avion Boeing 787-8 Dreamliner i kompanisë Air India,i cili udhëtonte drejt New Delhi, u detyrua të kthehej me urgjencë në Aeroportin Ndërkombëtar të Hong Kongut, vetëm pak minuta pas ngritjes ditën e sotme, për shkak të një problemi teknik të dyshuar.
Fluturimi AI315, i nisur nga Hong Kongu rreth orës 12:20 pasdite (ora lokale), u ul në mënyrë të sigurt rreth orës 13:15, pasi pilotët raportuan vështirësi teknike dhe kërkuan të jenë gati për ulje emergjente. Autoritetet konfirmuan se asnjë pasagjer nuk u lëndua dhe se incidenti nuk ndikoi në operacionet e aeroportit. Në një deklaratë zyrtare, Air India njoftoi se kthimi i avionit ishte një masë paraprake dhe se fluturimi po i nënshtrohej kontrolleve të shumta teknike. Avioni, që është 7 vjeçar, kishte arritur një lartësi prej 22,000 metrash para se të fillonte zbritjen.
Ky është incidenti i dytë brenda disa ditësh që përfshin avionë të të njëjtës kompani dhe model Boeing. Javën e kaluar, një tjetër avion Air India, në fluturim drejt Londrës, u rrëzua në Ahmedabad, Indi, vetëm pak çaste pas ngritjes, duke shkaktuar një tragjedi të rëndë me 241 viktima nga 242 persona në bord. Shkaqet e asaj ngjarjeje janë ende në hetim. Këto ngjarje përbëjnë një sfidë serioze për Air India, e cila po kalon një proces të gjerë reformimi të flotës dhe imazhit të saj ndërkombëtar. Po ashtu, ato rikthejnë në qendër të vëmendjes shqetësimet për sigurinë e avionëve Boeing, një kompani që në vitet e fundit është përballur me disa kriza që kanë tronditur reputacionin e saj global.
As Boeing, as Air India nuk kanë dhënë ende komente publike mbi shkaqet teknike të incidentit të fundit në fluturimin nga Hong Kongu për në New Delhi.
Zbuloni përfitimet e ujit të orizit për flokët!
Qershitë dhe zemra, një lidhje e shëndetshme!
