Gjatë një interviste në “Andale”, Vanesa Sono ka folur hapur për jetën e saj sentimentale, duke u ndalur te raporti aktual me ish-partnerin me të cilin ishte në një lidhje para hyrjes në reality show.
Pas eksperiencës televizive, ku vendosi t’i jepte fund marrëdhënies së saj për të nisur një romancë me Indritin, publiku ka qenë kurioz të dijë nëse mes saj dhe ish-të dashurit ka pasur ndonjë sqarim apo komunikim pas përfundimit të spektaklit.
E pyetur për këtë raport, Vanesa u tregua e drejtpërdrejtë, duke lënë të kuptohet se historia mes tyre është mbyllur përfundimisht.
“Gjithçka ka përfunduar, kaq mund të them. Edhe nga ana ime, edhe nga ana e tij. Nuk e kemi mbyllur si armiq, por ka marrë fund”, u shpreh ajo.
Megjithëse edhe lidhja e saj me Indritin përfundoi më vonë, Vanesa theksoi se nuk ka asnjë mundësi rikthimi me partnerin e saj të mëparshëm dhe se kapitulli mes tyre është mbyllur plotësisht.
Ajo zbuloi gjithashtu se marrëdhënia që zgjati më shumë se një vit kishte qenë e ndërlikuar që në fillim dhe sipas saj, duhej të kishte marrë fund që në muajt e parë.
Deklarata e Vanesës vjen si një sqarim përfundimtar mbi një nga temat më të komentuara të jetës së saj private, duke konfirmuar se tashmë secili ka vijuar rrugën e vet.
