Pete Davidson ka tërhequr vëmendjen me deklaratat e tij të fundit për ish-të dashurën, Kim Kardashian, duke e vlerësuar publikisht për suksesin që ka arritur në fushën e aktrimit.
Gjatë një episodi të podcastit të tij, komediani foli për rrugëtimin e Kim në industrinë e filmit dhe televizionit, duke pranuar se nuk e kishte imagjinuar që ajo do të shkëlqente aq shumë në këtë drejtim.
“Është e pabesueshme sa e mirë është Kim në aktrim,” tha ai gjatë bisedës me komedianen Nikki Glaser.
Davidson kujtoi një moment nga periudha kur ishin çift, kur Kardashian i kishte shprehur dëshirën për t’u bërë aktore. Sipas tij, në fillim e kishte mbështetur si një ambicie të re, por më vonë mbeti i surprizuar nga rezultatet që ajo arriti.
“Kur më tha se donte të merrej me aktrim, i thashë se ishte një ide e mirë. Më pas e pashë në role dhe mendova se po e bënte vërtet shkëlqyeshëm,” u shpreh ai.
Kim Kardashian debutoi si aktore në serialin “American Horror Story: Delicate” në vitin 2023, ndërsa më pas vijoi të angazhohej në projekte të tjera televizive dhe kinematografike.
Edhe Nikki Glaser, e cila ka punuar me të në filmin e Netflix “The Fifth Wheel”, e përshkroi Kardashian si një person shumë të zgjuar dhe tepër të vendosur për të realizuar objektivat e saj.
Davidson shkoi edhe më tej në vlerësimet e tij, duke e quajtur Kim një “supernjeri” dhe duke treguar se një nga mësimet më të vlefshme që ka marrë prej saj është të mos ndikohet nga gjykimet e të tjerëve.
Pete Davidson dhe Kim Kardashian i dhanë fund lidhjes së tyre në verën e vitit 2022, pas rreth nëntë muajsh romancë.
