Gopichand Hinduja, një nga figurat më të njohura të botës së biznesit dhe njeriu më i pasur në Britaninë e Madhe, ka ndërruar jetë në moshën 85-vjeçare në Londër.
Lajmi është konfirmuar nga familja e tij, e cila përmes një deklarate publike shprehu pikëllimin e thellë për humbjen e patriarkut të “Hinduja Group”. Familja me profil të ulët Hinduja renditet në krye të “Sunday Times Rich List” këtë vit me një pasuri kolektive prej 35.3 miliardë £, falë interesave të tyre të gjera në biznes, përfshirë bankat, naftën, pasuritë e patundshme dhe industrinë e argëtimit.
Gopichand Hinduja, i njohur me nofkën “GP”, bashkëkryesonte biznesin e familjes me vëllain e tij më të madh Srichand, i cili vdiq në 2023.
Vëllezërit u zhvendosën në Londër nga India në vitet 1970, ku vazhduan të ndërtonin Grupin Hinduja. Ai tani punëson më shumë se 150,000 njerëz në mbarë botën. Perandoria e familjes u zgjerua përmes një serie blerjesh të mëdha, duke përfshirë blerjen në vitin 1987 të grupit Ashok Leyland, i cili përfshinte pjesë të biznesit të falimentuar britanik të automobilave, British Leyland. Grupi gjithashtu bleu Gulf Oil nga kompania amerikane e naftës Chevron në vitet 1980.
