Abu Dhabi ka fituar sërish titullin e qytetit më të sigurt në botë, sipas Indeksit të Sigurisë 2025 të publikuar nga Numbeo. Kjo është hera e nëntë radhazi që kryeqyteti i Emirateve të Bashkuara Arabe kryeson këtë renditje globale, duke lënë pas qytete të njohura si Zyrihu, Doha dhe Tokio.
Ky vlerësim pasqyron nivelin shumë të ulët të kriminalitetit në qytet, besimin e lartë të qytetarëve ndaj autoriteteve dhe ndjenjën e sigurisë që përjetohet në jetën e përditshme. Qeveria e Abu Dhabit vazhdon të investojë fort në teknologji të avancuar survejimi, forca policore të trajnuara dhe shërbime emergjente të standardit të lartë.
Falë këtyre përpjekjeve, Abu Dhabi ruan një ambient të qetë dhe të pastër për banorët dhe vizitorët, duke u konfirmuar si një nga destinacionet më të sigurta dhe të besueshme në botë për të jetuar apo udhëtuar.
