Nga Brunilda Gorovelli
Dashuria e Arlind Gashit dhe Ueda Ndrecajt nuk pretendon të jetë perfekte, por është e ndërtuar mbi themele të forta. Në këtë intervistë për “Bordo”, çifti flet hapur për rrugëtimin e tyre nga ekrani në jetën reale, për prindërimin që i ka ndryshuar si njerëz dhe si partnerë, si dhe për rëndësinë e komunikimit, durimit dhe respektit në një marrëdhënie afatgjatë. Me një sinqeritet që i karakterizon, Arlindi dhe Ueda tregojnë se dashuria e vërtetë nuk është moment, por proces.
Si ju gjen shkurti 2026, emocionalisht dhe si çift?
Ueda: Na gjen më të qetë, më të pjekur dhe më të bashkuar. Jo perfektë, por të vërtetë. Dashuria sot është një zgjedhje e përditshme, jo vetëm ndjenjë. Gjithashtu, është një muaj i rëndësishëm për Arlindin, pasi duhet të planifikojë ditëlindjen time dhe Shën Valentinin (me pak shaka).
E festoni çdo vit Shën Valentinin? Ka rëndësi për çiftin tuaj kjo festë?
Arlindi: E festojmë, por pa presion. Jemi një çift shumë i thjeshtë dhe preferojmë të bëjmë gjëra domethënëse për njëri-tjetrin. Për ne nuk është vetëm një ditë në vit, por çdo ditë kur respektojmë, falim dhe qëndrojmë bashkë.
Si është jeta juaj e përditshme nën të njëjtën çati?
Ueda: Plot zhurmë, të qeshura, lodhje dhe dashuri. Një shtëpi e gjallë, jo perfekte, por e mbushur me ngrohtësi. Nuk kemi ndarje të rrepta detyrash; ndonjëherë Arlindi kujdeset më shumë për Amean, herë të tjera unë.
Çfarë keni mësuar për njëri-tjetrin duke jetuar bashkë?
Ueda: Që dashuria nuk është vetëm të duash, por edhe të durosh, të kuptosh dhe të rritesh bashkë. Është shumë e rëndësishme të kuptosh gjuhën e dashurisë së partnerit dhe të dish të bësh kompromis kur është e nevojshme.
I keni të ndara punët në shtëpi? Si?
Arlindi: Po, por në mënyrë fleksibël. Kush ka më shumë kohë, bën më shumë. Martesa nuk është llogari, është ekip.
Kush kujdeset më shumë për vajzën?
Arlindi: Të dy. Prindërimi nuk ka gjini – ka përgjegjësi dhe përkushtim.
Ndonjë bebe tjetër? Jeni si shqiptarët që e doni edhe një djalë?
Ueda: Nëse Zoti do, pse jo. Do të ishte një përvojë ndryshe të rrisje një djalë dhe diçka e re për ne. Por mbi të gjitha, më e rëndësishmja është të kemi fëmijë të shëndetshëm.
Çfarë ka ndryshuar më shumë në raportin tuaj që nga momenti kur u njohët?
Arlindi: Jemi bërë më të qetë. Më pak ego, më shumë “ne”. E kuptojmë njëri-tjetrin më mirë dhe mundohemi gjithmonë të gjejmë gjuhë të përbashkët.
A është më e vështirë apo më e bukur të dashurosh jashtë kamerave?
Ueda: Është më e vështirë, por edhe më e bukur. Jashtë kamerave dashuria është më e pastër, sepse njeh më mirë zakonet e këqija të njëri-tjetrit dhe zgjedh sërish të duash. Dashuria jonë është edhe më e madhe tani që kemi një engjëll të vogël që vrapon nëpër shtëpi.
Si ju ka ndryshuar prindërimi si njerëz dhe si çift?
Ueda: Na ka bërë më të durueshëm, më të përgjegjshëm dhe më mirënjohës për njëri-tjetrin. Për ne është shumë e rëndësishme që vajza jonë të shohë një dashuri nga e cila merr mesazhe të shëndetshme. Duam që lidhja jonë të jetë shembull për atë që ajo mund të kërkojë në të ardhmen.
Momentin e ardhjes në jetë të Ameas, si e jetuat? Emocione, frikë?
Arlindi: Ishte një moment që ta ndryshon jetën përgjithmonë. Lot, frikë, por mbi të gjitha një dashuri që nuk përshkruhet me fjalë.
Si e ndani rolin e prindit mes jush?
Arlindi: Me komunikim. Nuk ka “roli im” apo “roli yt”, por “fëmija ynë”. Është shumë e rëndësishme të vendosësh pritshmëri të qarta dhe t’ia kërkosh partnerit gjërat që të duhen, në vend që të presësh. Komunikimi është çelësi.
Kur e kuptuat se kjo lidhje nuk ishte më lojë, por jetë?
Ueda: Ishte e qartë që në fillim, edhe gjatë programit televiziv. Kishim një ndjesi shumë të fortë për dashurinë tonë dhe ajo u bë edhe më e fortë jashtë, kur mësuam se prisnim një fëmijë. Besuam dhe punuam fort për të ardhmen tonë. Kur filluam të mendonim për jetën dhe jo vetëm për momentin.
A mendoni se dashuria juaj do të kishte mbijetuar pa kamerat?
Arlindi: Po. Sepse baza jonë nuk ishin kamerat, por respekti dhe besimi në dashurinë tonë. Të dy ndjemë diçka, që nuk e kishim ndjerë kurrë më parë dhe besuam në të.
Mesazhi juaj për këtë Shën Valentin?
Ueda: Dashuria nuk është perfekte. Por nëse ka respekt, komunikim dhe durim, ajo fiton çdo betejë. Shën Valentini është një ditë e bukur për të treguar mirënjohje dhe vlerësim, por dashuria duhet të ndihet çdo ditë përmes gjesteve të vogla: ndihmë në shtëpi, kohë cilësore së bashku dhe larg telefonave.
Galeria fotografike
