Alyssa Kincaid, 27 vjeç, është pesë muajshe shtatzënë dhe kohët e fundit mësoi se vuan nga limfoma e fazës 4. Ato që nisën si simptoma të pazakonta gjatë shtatzënisë së saj fillimisht u shpërfillën nga disa mjekë, që i thanë se kishte “thjesht një barrë të vështirë”.
E çuam në urgjencë, ajo u shtrua në spital, doli nga spitali dhe na u desh ta merrnim përsëri të nesërmen," tha Amanda Kincaid, nëna e Alyssa-s. "Atëherë e kuptova se diçka nuk ishte në rregull."
Amanda thotë se atëherë intuita e saj prej nënë hyri në punë dhe testet e mëtejshme zbuluan kancerin. Alyssa, një ish-lojtare futbolli e Universitetit Fresno Pacific dhe entuziaste e aktiviteteve në natyrë, filloi kimioterapinë brenda pak ditësh.
Mjekët i thanë se në fakt foshnja e saj i shpëtoi jetën – pasi kanceri mund të kishte kaluar një kohë të gjatë e të rrezikshme pa u zbuluar.
Në këtë pikë, ata thonë se vajza e saj e vogël, të cilën e ka quajtur Addison, është e shëndetshme dhe aktive. Alyssa thotë se ndjesia e shkelmave të vajzës së saj i jep forcë për të vazhduar.
"Ajo është padyshim një mrekulli," tha Alyssa. "Të kesh kancer është një gjë, por edhe të mbash një jetë tjetër brenda teje në të njëjtën kohë mund të duket pak stresuese. Por është gjithashtu shumë ngushëlluese, të dish se fizikisht nuk po e kaloj vetëm këtë."
