Meghan Markle ka shënuar një arritje të re në karrierën e saj televizive, pasi emisioni “With Love, Meghan” është nominuar në Daytime Emmy Awards, pavarësisht se Netflix ka vendosur të mos e vazhdojë projektin me një sezon të tretë.
Dukesha e Sussex-it e ndau lajmin me ndjekësit në Instagram, ku shprehu mirënjohjen për të gjithë ekipin që punoi në realizimin e emisionit.
“Urime ekipit të jashtëzakonshëm, producentëve dhe të gjithë bashkëpunëtorëve të ‘With Love, Meghan’. Jemi nominuar për një Emmy në kategorinë Outstanding Lifestyle Series”, shkroi ajo.
Në garën për çmimin, emisioni do të përballet me produksionet “A Different Breed”, “George to the Rescue”, “The Motherhood” dhe “The Wizard of Paws”. Fituesit do të shpallen në ceremoninë e 53-të të Daytime Emmy Awards, e cila do të transmetohet më 30 tetor.
“With Love, Meghan” u publikua në Netflix në mars të vitit 2025 dhe ndërthurte receta gatimi, kopshtari, organizim eventesh në shtëpi dhe momente nga jeta e përditshme e Meghan në rezidencën e saj në Montecito, Kaliforni.
Emisioni pati dy sezone dhe një episod special për festat e fundvitit. Megjithëse u mirëprit nga një pjesë e publikut, ai u përball edhe me kritika, veçanërisht në Mbretërinë e Bashkuar, ku disa e cilësuan si të shkëputur nga realiteti.
Në fillim të këtij viti u raportua se Netflix nuk do ta rinovonte projektin për një sezon të tretë, pasi sezoni i dytë nuk arriti të hynte në listën e dhjetë programeve më të ndjekura të platformës.
Pas përfundimit të emisionit, Meghan vendosi t’i përkushtohej markës së saj të stilit të jetesës, As Ever. Megjithatë, më vonë u bë e ditur se edhe bashkëpunimi i kësaj marke me Netflix kishte marrë fund.
Sipas burimeve pranë industrisë, mbyllja e emisionit bëri që partneriteti të mos kishte më arsye për të vazhduar. Ndërkohë, Netflix vlerësoi kreativitetin e Meghan dhe rolin që pati në lançimin e markës, ndërsa përfaqësuesit e As Ever konfirmuan se kompania do të vijojë e pavarur me projekte të reja.
Meghan Markle dhe Princi Harry nënshkruan në vitin 2020 një marrëveshje shumëvjeçare me Netflix, e vlerësuar rreth 100 milionë dollarë, pak pasi u tërhoqën nga detyrat si anëtarë aktivë të familjes mbretërore britanike.
