Lauren Sánchez i ka shtuar koleksionit të saj të bizhuterive një unazë të re martese, e cila ka tërhequr vëmendje për shkak të vlerës së saj marramendëse prej 4 milionë dollarësh (rreth 3.4 milionë euro). Fotot e fundit tregojnë unazën elegante në dorën e saj, bashkë me një tjetër unazë të madhe diamanti. Njëra ka prerje jastëku, ndërsa tjetra është me diamant në formë ovale.
Eksperti i bizhuterive, Zack Stone nga kompania Steve Stone, tha se unaza përmban një diamant të rrallë 20 karatësh me prerje jastëku, të vendosur mbi një bazë platini. Sipas tij, unaza me diamantin oval ka një vlerë më të lartë se unaza rozë 20 karatësh që Jeff Bezos përdori për t’i propozuar Sánchez në vitin 2023, e cila vlerësohej rreth 2.5 milionë dollarë (2.1 milionë euro).
Sánchez u pa gjithashtu me një byzylyk të personalizuar me inicialet “LB”, që mund të simbolizojnë emrin e saj të ri pas martesës. Ceremonia luksoze, e zhvilluar në Itali, mendohet të ketë kushtuar mes 46 dhe 55 milionë dollarë (39–47 milionë euro). Megjithatë, dasma nuk u prit mirë nga banorët e Venedikut, të cilët protestuan kundër ngjarjes për shkak të ndikimit të turizmit në qytet.
Jeff Bezos, themeluesi i Amazon, dhe Lauren Sánchez u martuan ligjërisht në SHBA, por organizuan një ceremoni madhështore në ishullin San Giorgio Maggiore. Të pranishëm ishin figura të njohura si anëtarë të familjes Trump, motra nga familja Kardashian, Oprah Winfrey, Leonardo DiCaprio, Bill Gates, Barbra Streisand, Usher dhe Orlando Bloom.
