Më shumë se gjashtë dekada pas vdekjes së Marilyn Monroe, një biografi e re po rikthen në vëmendje rrethanat misterioze të fundit të jetës së ikonës së Hollivudit. Sipas autorit dhe gazetarit Andrew Wilson, aktorja nuk ishte viktimë e një komploti dhe as nuk i dha fund jetës së saj me vetëdije, por mund të ketë humbur jetën si pasojë e një gabimi mjekësor.
Wilson, i cili ka studiuar dokumente dhe dëshmi të shumta për librin e tij më të ri, pretendon se mjeku personal i Monroe, Hyman Engelberg, i kishte përshkruar një kombinim ilaçesh që rezultoi fatal. Në qendër të teorisë së tij është një recetë e zbuluar vite më vonë, e cila sipas autorit dëshmon se mjeku i kishte rekomanduar aktores kloral hidrat, një medikament që, i kombinuar me barbituratin Nembutal, mund të ketë shkaktuar mbidozën vdekjeprurëse.
Sipas Wilson, Engelberg e mohoi për vite me radhë se kishte përshkruar një ilaç të tillë, por dokumentet e gjetura gjatë kërkimeve hedhin dyshime mbi versionin e tij. Autori beson se nuk bëhet fjalë për një veprim të qëllimshëm, por për një vlerësim të gabuar me pasoja tragjike.
Në muajt e fundit të jetës, Monroe po përballej me probleme të shumta personale dhe profesionale. Ajo vuante nga depresioni, ndërsa ishte larguar edhe nga një projekt filmik. Sipas biografisë, gjatë dy muajve të fundit asaj iu përshkruan qindra doza medikamentesh, një sasi që konsiderohet jashtëzakonisht e lartë.
Vdekja e saj më 5 gusht 1962 ka qenë prej dekadash objekt debatesh dhe teorish të ndryshme, duke përfshirë pretendime për vetëvrasje apo edhe përfshirje të figurave politike. Megjithatë, Wilson argumenton se shpjegimi mund të jetë shumë më i thjeshtë dhe njëkohësisht tragjik: një kombinim i rrezikshëm ilaçesh i administruar pa kujdesin e duhur.
Natën kur u gjet pa shenja jete në shtëpinë e saj në Los Angeles, Monroe ishte izoluar në dhomën e gjumit. Pas shqetësimit të stafit të shtëpisë, psikiatri i saj hyri me forcë në dhomë dhe e gjeti aktoren të pajetë. Më pas u njoftua mjeku i saj personal, i cili konfirmoi vdekjen.
Pavarësisht mistereve që vazhdojnë të rrethojnë fundin e saj, Marilyn Monroe mbetet një nga figurat më të rëndësishme të historisë së kinemasë. Përtej imazhit të simbolit të seksit, ajo u dallua si një grua ambicioze që kërkoi kontroll mbi karrierën dhe imazhin e saj, duke u bërë frymëzim për breza të tërë artistesh.
