Rezart Veleshnja duket se po përjeton një histori të re dashurie, të cilën deri më tani ka zgjedhur ta mbajë larg vëmendjes së publikut.
Prej disa kohësh, aktori i humorit ka shtuar dyshimet e ndjekësve përmes postimeve të ndryshme në rrjetet sociale. Në fotografitë e publikuara, ai është kujdesur të mos e zbulojë plotësisht vajzën që ka në krah, duke treguar vetëm detaje të vogla, si flokët apo dorën e saj.
Këto sinjale kanë mjaftuar që në rrjet të nisë kërkimi për identitetin e partneres misterioze, ndërsa interesi i mediave rozë është rritur dita-ditës.
Sipas burimeve të “Prive”, vajza që i ka rrëmbyer zemrën Rezartit është pjesë e së njëjtës botë profesionale me të. Ajo është gjithashtu aktore, ndërsa pamjet e siguruara tregojnë se mes tyre ekziston një raport i afërt dhe tashmë i konsoliduar.
Edhe pse aktori nuk ka bërë ende një prezantim zyrtar të partneres së tij, duket se lidhja mes tyre nuk është më vetëm në fazat e para. Tashmë mbetet për t’u parë se kur dyshja do të vendosë të dalë publikisht dhe ta ndajë hapur historinë e dashurisë me ndjekësit.
