Finlanda është shpallur për të tetin vit radhazi vendi më i lumtur në botë nga Raporti Botëror i Lumturisë i Kombeve të Bashkuara. Megjithatë, për vetë finlandezët, ky vlerësim nuk lidhet me gëzim të përhershëm apo optimizëm të zhurmshëm. Përkundrazi, “lumturia” në Finlandë përkufizohet më mirë si kënaqësi, përmbushje dhe një ndjenjë e qëndrueshme ekuilibri në jetën e përditshme.
Finlandezët e pranojnë këtë titull me modesti, shpesh me një ngritje supesh. Shumë prej tyre besojnë se termi “lumturi” nuk e përshkruan saktë realitetin e tyre. Siç ka theksuar edhe presidenti i Finlandës, Alexander Stubb, askush nuk mund të jetë i lumtur gjatë gjithë kohës, por vendosja e bazave të forta siguria, liria dhe barazia krijon kushtet për një jetë të mirë dhe të qëndrueshme.
Kjo filozofi është e rrënjosur thellë në përditshmërinë finlandeze dhe po tërheq gjithnjë e më shumë vizitorë nga e gjithë bota. Turistët nuk vijnë për të gjetur një popull gjithmonë të buzëqeshur, por për të përjetuar një mënyrë jetese të balancuar, të lidhur ngushtë me natyrën, mirëqenien mendore dhe respektin për hapësirën personale.
Një nga elementet më përfaqësuese të kësaj jete është kultura e saunës, e konsideruar thelbësore për shëndetin fizik dhe mendor. Finlanda është gjithashtu një nga vendet më të sigurta në botë, ku rreziqet për vizitorët janë minimale shpesh të përshkruara me humor, si mundësia për t’u ndeshur me drerë të lirë në veri të vendit. Në të njëjtën kohë, kuzhina finlandeze po fiton vëmendje ndërkombëtare, me restorante të vlerësuara dhe përdorim të gjerë të produkteve natyrore si peshku, kërpudhat, manaferrat dhe mishi i egër, të aksesueshme për të gjithë falë ligjit të “Së Drejtës së Çdokujt” për të shijuar natyrën.
Kryeqyteti Helsinki ofron një pasqyrë të qartë të këtij stili jetese. I shtrirë buzë detit, i rrethuar nga ishuj, parqe dhe pyje, qyteti u mundëson banorëve dhe vizitorëve akses të shpejtë në natyrë. Sipas të dhënave, çdo qytetar në Finlandë jeton mesatarisht vetëm rreth 200 metra larg një hapësire natyrore një faktor që lidhet drejtpërdrejt me ndjenjën e mirëqenies dhe lirisë personale.
Ndërkohë, Lapland, rajoni verior i Finlandës, po shndërrohet gjithnjë e më shumë në një nga destinacionet turistike më të vizituara të Europës. Rritja e interesit global për Finlandën si “vendi më i lumtur në botë” ka ndikuar drejtpërdrejt edhe në fluksin e vizitorëve drejt këtij rajoni arktik. Lapland tërheq turistë për natyrën e paprekur, aurorën boreale, aktivitetet dimërore dhe qetësinë ekstreme që ofron elemente që mishërojnë në mënyrë të plotë filozofinë finlandeze të jetës së thjeshtë dhe të balancuar.
Rovaniemi, i njohur si shtëpia zyrtare e Babagjyshit të Vitit të Ri, ka shënuar sezone rekord turistike, ndërsa kërkesa për përvoja autentike si safari me qentë e sanisë, banja në sauna të akullta dhe noti në ujëra të ftohta pas saunës, është në rritje. Këto përvoja nuk shihen thjesht si atraksione turistike, por si pjesë e jetës së përditshme finlandeze që ndihmon në ruajtjen e shëndetit mendor dhe emocional.
Ekspertët theksojnë edhe rëndësinë e konceptit sisu një term finlandez që përfshin qëndrueshmërinë, guximin dhe forcën për të përballuar vështirësitë pa u dorëzuar. Ky mentalitet, i kombinuar me një shtet social të fortë, shërbime publike cilësore, arsim dhe shëndetësi të aksesueshme për të gjithë, përbën bazën e asaj që e mban Finlandën vazhdimisht në krye të renditjeve të mirëqenies.
Megjithatë, edhe Finlanda përballet me sfida. Dimrat e gjatë dhe të errët mund të ndikojnë në shëndetin mendor, ndërsa presionet ekonomike nuk mungojnë. Pavarësisht kësaj, shumica e finlandezëve shprehen mirënjohës për stabilitetin dhe cilësinë e jetës që gëzojnë. Siç shprehet një pensionist për BBC-në, “ndoshta nuk jemi gjithmonë të gëzuar, por me atë që kemi, jemi të kënaqur”.
Në thelb, të jetosh në vendin më të lumtur në botë do të thotë të jetosh në një shoqëri që vlerëson mjaftueshmërinë, besimin, natyrën dhe ekuilibrin një model jete që sot po frymëzon jo vetëm banorët e saj, por edhe miliona vizitorë, veçanërisht ata që zgjedhin Lapland-in për të përjetuar nga afër këtë “lumturi të qetë” finlandeze.
Burimi (BBC)
