Një ngjyrë mund të bëhet sinonim i një marke dhe ta identifikojë atë përjetë. Shembulli më i qartë është Tiffany & Co., shtëpia legjendare e bizhuterive, e njohur në mbarë botën për blu-në e saj të veçantë dhe karakteristike Tiffany.
E themeluar në Nju Jork në vitin 1837 nga Charles Lewis Tiffany, kompania nisi fillimisht si një dyqan me artikuj dekorativë dhe kancelarie. Me kalimin e viteve, Tiffany arriti të ngrejë statusin e produkteve të saj, jo vetëm falë mjeshtërisë në bizhuteri, por edhe përmes zgjedhjeve strategjike të marketingut: një ngjyrë unike dhe një paketim i dallueshëm e i dëshirueshëm.
Nuanca karakteristike, mes blusë dhe jeshiles së lehtë (aquamarine), u përdor për herë të parë në vitin 1845, kur themeluesi e zgjodhi për kopertinën e katalogut të parë të shitjeve me porosi. Thuhet se frymëzimi erdhi nga vezët e zogut robin amerikan dhe nga popullariteti i gurit të bruztë (turquoise) në atë periudhë. Që nga ai moment, kutia Tiffany në këtë blu të veçantë u shndërrua shpejt në simbol suksesi dhe aspirate.
Nga fillimi i shekullit XX e deri më sot, kompania ka ndjekur një rregull të veçantë: asnjë paketim Tiffany nuk mund të largohet nga dyqani pa një bizhuteri brenda, duke e bërë paketimin pjesë integrale të produktit. Në vitin 1998, ngjyra u regjistrua zyrtarisht dhe në 2001 u katalogua nga Pantone me emrin 1837 Blue, duke u konsoliduar si një ikonë globale.
Në historinë e saj, Tiffany & Co. ka arritur ta bëjë të njohur bizhuterinë e lartë fillimisht në Shtetet e Bashkuara dhe më pas në mbarë botën. Por suksesi i saj afatgjatë lidhet edhe me zgjedhje të menduara mirë dhe strategji marketingu fituese, të cilat e kanë bërë markën, edhe pas gati 190 vitesh nga themelimi, një emblemë të luksit botëror.
