Veronique Nichanian, drejtoresha artistike e linjës së modës për meshkuj në Hermès, ka njoftuar largimin e saj pas 37 vitesh në shtëpinë e njohur franceze të modës, konfirmoi marka të premten.
Nichanian, 71 vjeçe, ka qenë arkitektja e pamjes mashkullore të Hermes që nga 1988, duke krijuar koleksione që i kanë dhënë shtëpisë prestigj klasik dhe elegancë të qëndrueshme. Lajmi i largimit të saj u raportua për herë të parë nga gazeta franceze Le Figaro.
Ky ndryshim ndodh në një kohë kur industria e luksit po përjeton ristrukturime të mëdha kreative, me shumë marka të njohura që po rekrutojnë dizajnerë të rinj, si Matthieu Blazy te Chanel dhe Jonathan Anderson te Dior. Ndërkohë, Hermes ka mbajtur ritmin e shitjeve në rritje, duke u favorizuar nga klientela e saj e pasur, e cila vazhdon të blejë çantat klasike të markës, përfshirë ikonën Birkin.
Nichanian largohet duke lënë pas një trashëgimi të jashtëzakonshme, duke shënuar fundin e një epoke në modën mashkullore të Hermes.
