Këngëtarja britanike Jessie J ka publikuar një mesazh të hapur dhe emocional për të rritur ndërgjegjësimin mbi kancerin e gjirit, duke ndarë me publikun përvojën e saj personale gjatë betejës me sëmundjen.
Artistja, emri i vërtetë i së cilës është Jessica Ellen Cornish, ka qenë e hapur për gjendjen e saj shëndetësore që nga momenti kur zbuloi diagnozën me kancer në gji në fazë të hershme në qershor të vitit të kaluar. Që prej asaj kohe, ajo ka dokumentuar hap pas hapi trajtimin dhe procesin e rikuperimit.
Në një video të publikuar së fundmi nga spitali, Jessie J ka treguar momentet pas një mastektomie në anën e djathtë, duke shoqëruar postimin me një mesazh të drejtpërdrejtë për ndjekësit: “Kontrolloni gjoksin dhe sqetullat. Mund t’ju shpëtojë jetën.”
View this post on Instagram
Në maj, këngëtarja bëri të ditur se kishte marrë lajmin se ishte pa kancer pas një rezonance magnetike dhe kontrolli vjetor, duke thënë se kishte “qarë për orë të tëra” nga lehtësimi.
Gjatë gjithë këtij procesi, ajo ka ndarë edhe sfidat personale, përfshirë ndërhyrjen kirurgjikale, një operacion të dytë dhe shtyrjen e disa angazhimeve artistike. Pavarësisht vështirësive, Jessie J është rikthyer në skenë dhe ka theksuar se përvoja e ka ndryshuar përgjithmonë.
Ajo ka falënderuar mjekët që e kanë trajtuar dhe ka inkurajuar gratë që të jenë më të kujdesshme ndaj trupit të tyre, duke nënvizuar rëndësinë e zbulimit të hershëm të sëmundjes.
“Që e vogël më kanë ndodhur shumë gjëra, por asgjë nuk më ka thyer,” ka thënë ajo më herët në një intervistë.
Mesazhi i saj i fundit është pritur me mbështetje të gjerë nga fansat dhe publiku, duke e vlerësuar për hapjen dhe guximin në ndarjen e një beteje kaq personale.
