Aktorja britanike Lily Collins do të mishërojë ikonën e kinemasë Audrey Hepburn në një film të ri që do të rrëfejë historinë e realizimit të filmit klasik të vitit 1961 Breakfast at Tiffany’s.
Skenari do të adaptohet nga Alena Smith, krijuesja e serialit Dickinson, dhe bazohet në librin bestseller Fifth Avenue, 5 A.M. të autorit Sam Wasson. Libri ofron rrëfimin më të plotë deri më sot mbi realizimin e filmit dhe ndikimin e tij në kulturën amerikane të fundviteve ’50.
Historia sjell në fokus figurat kyçe të produksionit, përfshirë shkrimtarin Truman Capote dhe regjisorin Blake Edwards, duke treguar se si personazhi i Holly Golightly ndryshoi përgjithmonë mënyrën se si Hollywood-i portretizonte gratë, modën dhe seksualitetin.
Audrey Hepburn, një nga figurat më të mëdha të Epokës së Artë të Hollywood-it, fitoi Oscar për rolin e saj në Roman Holiday dhe luajti në filma të tjerë klasikë si Sabrina dhe Funny Face, përpara se të kurorëzonte statusin e saj si ikonë globale me “Breakfast at Tiffany’s”. Filmi, prodhim i Paramount Pictures, u nominua për pesë çmime Oscar dhe fitoi dy, ndërsa në vitin 2012 u përfshi në National Film Registry për rëndësinë e tij kulturore dhe historike.
Aktualisht, Collins po shijon sukses të madh me serialin hit Emily in Paris në Netflix, i cili është rinovuar për një sezon të gjashtë. Ajo ka prodhuar gjithashtu thrillerin Windfall dhe së fundmi ka njoftuar një adaptim filmik të lodrës ikonike Polly Pocket, në partneritet me Mattel dhe kompaninë e Reese Witherspoon, Hello Sunshine.
View this post on Instagram
Filmi për Hepburn pritet të jetë një dramë biografike që jo vetëm do të rikthejë në ekran një nga yjet më të dashura të historisë së kinemasë, por edhe do të zbulojë prapaskenat e krijimit të një prej filmave më me ndikim të shekullit XX.
