Familja Affleck është në zi. Nëna e aktorëve të njohur Ben dhe Casey Affleck, Chris Anne Affleck, është ndarë nga jeta në moshën 83-vjeçare, pas një beteje me kancerin e pankreasit. Lajmi u bë publik përmes një nekrologjie të botuar nga familja në gazetën “The Boston Globe”.
Chris Anne u diagnostikua me sëmundjen në dhjetor të vitit 2025, ndërsa mjekët i kishin thënë se mund t’i kishin mbetur vetëm gjashtë muaj jetë. Ajo ndërroi jetë paqësisht në gjumë më 2 qershor 2026.
Një prej detajeve më prekëse të nekrologjisë lidhet me dëshirën e saj të fundit. Pas diagnozës, Chris Anne kishte kërkuar të jetonte mjaftueshëm për të parë nipin e saj të diplomohej nga shkolla e mesme. Ajo arriti të merrte pjesë në ceremoninë e diplomimit e rrethuar nga familja, vetëm dy ditë përpara se të ndahej nga jeta.
Në homazhin e publikuar nga familja, Ben dhe Casey përshkruhen si njerëzit e saj më të dashur, ndërsa pesë nipërit dhe mbesat cilësohen si forca që i dha kuptim dy dekadave të fundit të jetës së saj.
Përveç rolit të saj si nënë dhe gjyshe, Chris Anne kishte ndërtuar një karrierë të gjatë në arsim. E diplomuar në Harvard, ajo punoi për rreth 35 vjet si mësuese në shkollat publike, përpara se të dilte në pension në vitin 2008.
Edhe pas përfundimit të karrierës profesionale, ajo mbeti aktive në çështje sociale dhe humanitare. Chris Anne kontribuoi në fushatën presidenciale të Barack Obamës, u angazhua me organizata për drejtësinë e ujit në Palestinë dhe ishte ndër anëtaret themeluese të bordit të projektit “Sustainable Cape” në Massachusetts.
Chris Anne ishte gjithashtu një nga mbështetëset më të mëdha të karrierës së dy djemve të saj. Ajo i shoqëroi dhe i inkurajoi që në hapat e parë në aktrim, shumë përpara se Ben dhe Casey Affleck të shndërroheshin në dy prej emrave më të njohur dhe të vlerësuar të Hollivudit.
Në ditët e fundit të jetës, ajo arriti të realizonte dëshirën më të madhe: të ishte pranë familjes dhe të dëshmonte një prej momenteve më të rëndësishme të nipit të saj.
